auf und zua und hi und zruck, mia lassn uns ned los
de liebe is koa breznsalz, sie fallt dir ned in schoß
de liebe is a weißbierschaum, irgendwann perlts aus
es war scho hundert moi vorbei, aba i bleib dro

eizogn bin i, die chancen guat, a sechsa mit zusatzzahl
wia i auszogn bin, war’s a oanzigs kreiz, a schier endlose qual
de tür fallt hinta mir ins schloss, i bin a freia, einsama mo
mia werdn uns woi nia wiedasegn, aba i bleib dro

i hob mi in meim job vazettelt, ohne rücksicht auf valust
beim abendessn host nur glacht, red doch koan soan stuss
da wald, de wiesn warn dei welt, ned gartenschau und zoo
in der zeit hob i vui vasamt, aba i bleib dro

mei lebn steckt in am rollkoffa, i scheppert übern hof
servus hello, servus goodbye, da ganze bua a philosoph
de züg fahrn olle nur no ob, koana kummt mehr o
mei reservierung is vafoin, aba i bleib dro

freilich gibts no andre, mei frau, mei freindin, de ex
oiwei gehts um liebe, an de guatn dog a um sex
i leb nur mit oana zsamm, weil ma ned ois ham ko
bis wieda 68 is dauerts no a weng, aba i bleib dro

do war a frau, wos soi i sogn, de scheenste aufm fest
und a no schlau, anders ois der fade rest
es kam zu aner knutscherei hintn vorm klo
sie hod se nia mehr g’meldt, aba i bleib dro

sie natürlich rote lippen, hohe schuah, türkis
i da unbekannte stuntman, gfragt wenns gfährlich is
olle klatschn, koana spürt wos, backstage prosecco
mei werkstatt volla spinnawebn, aba i bleib dro

julia, petra, barbara, i ko mi ned beschwern
grün, gründe, untergrund, sex vom andern stern
de folgn warn abzusehn, du ruafst wochenlang ned o
du mit deim schlaumeimoasta, aba i bleib dro

in da arbeit is da deife los, götter tanzn aufm tisch
barfuaß auf am scherbnhaufa, as bluat oiwei frisch
jeda nimmt, koana gibt, dass da mensch so bled sei ko
don quixotte werd ausglacht, aba i bleib dro

angie schreibt gedichte, in da bar hört koana zua
sie war a model in de 80er, i bloß a landbua
da rote marc draht filme, koana schauts ned o
i post auf facebook, koa like, aba i bleib dro

jede flaschn is a botschaft, mia wern guat umsorgt
da sepp vatritt sei haltung, sei meinung moan i korkt
er spricht in siebn rätseln, a oanzigs sudoku
ma ko ned ned kommuniziern, aba i bleib dro

auf jetzt mädels, auf jetzt buam, gebt’s eich an schmatz
nur wer obn aufm maibaum war, hod am himmel kratzt
purzlbaum durch’d wolkn, arschbombn, as ganze tableau
da tauchsieder is ohne strom, aba i bleib dro