kellertreppn, kistnschleppn
rewe, ikea, obi, görtz
zu wenig berührungen
aba sonntag abend wos fürs herz

genervte stundn
unvollendete rundn
freili gabs da verführungen
verlockungen, verwirrungen

hob mi a lebn lang entschieden
zwischen den kloana kriegn
und de großn liebn
imma bin i bliebn
oda zumindast zruckkemma

draußn hob i auf throne gsessn
hob vo marmorne tafeln gessn
in kutschn hams mi gfahrn
mit goldne becha ogstossn

nix kehrt wärma ois neie besn
draußn war imma ois staubfrei gwesn
ois a schmarrn
dahoam wars scho bessa im ganzn und großn

hob mi a lebn lang entschieden
zwischen den kloana kriegn
und de großn liebn
imma bin i bliebn
oda zumindast zruckkemma

a kloans scharmützel hi und do
dampf ablassn, augn rolln, schrein
weida macha ois war nix gwen
im schlechtestn as guade seghn

geborgenheit werd untaschätzt
vaständnis und vazeihn
in na zeit wo jeda hetzt
wars bei uns friedlich

ham uns a lebn lang entschieden
zwischen den kloana kriegn
und de großn liebn
imma samma bliebn
oda zumindast zruckkemma